Nomina hoben ehemplar y talentoso pa e Premio Hala di Shoco di Parlamento

E  aña aki atrobe lo tin Premio Hala di Shoco di Parlamento di Aruba. 
E Hala di Shoco di Parlamento di Aruba ta simbolisa hubentud cu sabiduria, ambicion y liderazgo.
E meta di e Premio Hala di Shoco ta pa honra hoben na Aruba cu ta bon ehempel pa hubentud y cu a contribui positivamente na nos comunidad y nos pais.

Tur ciudadano di Aruba cu ta haya cu un persona ta cumpli cu e criterionan por manda un nominacion na Parlamento di Aruba. Ta spera cu specialmente e scolnan y organisacionnan no gubernamental cu ta traha cu hoben por nomina un of mas hoben talentoso cu nan ta considera como ehempel pa otro hoben.

Pa cualifica pa e Premio Hala di Shoco, e nominado mester cumpli cu e siguiente criterianan: 

• E nominado mester tin nacionalidad Hulandes y/of a biba na Aruba pa un periodo continuo di minimo 10 aña y tawata registra na e registro civil durante e periodo aki.
• E nominado mester tin entre 15 pa 24 aña.
• E nominado mester a aporta na desaroyo di comunidad y pais.
• E nominado mester a demostra capacidad di liderazgo y habilidad pa motiva otro hende.
• E aportacion/logronan mester a tuma luga den e ultimo cinco añanan.
• E contribucion mester a wordo haci den capacidad personal, no como un funcionario di gobierno nombra of eligi.